 |
 |
|
| وطن منه اوغول دئسه نه غمیم! |
|
هاشم ترلان 21آذر و پيشه وري (1) (پوئمادان پارچالار)
توتوب غددار اتهييندن من زامانين چوخ يانميشام بير آرزونون حسرتينه. خلقيم دئيه،شمع تك يانان بير انسانين. رسام كيمي جيلوه وئرهم صورتينه.
هرجبهه نين بايراقداري او رهبرين، يئری بوشدور چوخ شاعرين دفترينده. دار آياقدا ايلهامچيسي هر سنگرين، نقش اولونسون اديبلرين اثرينده.
جاوان واختي قوجاقيندا مئشهلرين، گلديم دئدي، تاليشلارا، گيلكلره. كسمك اوچون ناحقلرين ريشه لرين، ال اوزاتدي كؤمك اومان ديلكلره.
هجر كيمي ايگيد آنا دوغدو اونو، دئدي:دردين قوي قاريشسين ائل دردينه. بيلمهسنده شادليغين نه اولدوغونو، رحم ائيلهمه هر دؤورانين نامردينه.
بولوتلاردان چاخان زامان ايلديريملار، او گوز اوجو باخيب گولدو زيندانلارا. قيشدا توفان، ياي چاغيندا ايستي قوملار، محبتين کسنمهدی اينسانلارا.
وطن دئدي او گؤز يومدو عيش- نوشدان، غربتدهده جان سؤيلهدي دوستا، يارا. آراز اوسته اؤتوب کئچن قارانقوشدان، دئدي:مندن سالام آپار اوبالارا،
سالام آپار آنا يوردا بيلسين كي من، آيريليغين حسرتيندن داش اوستهيم. دوغرودوركي اوتاي وطن، بوتاي وطن، سنسيز يئنه هارادا اولسام قفسدهيم.
سالام آپار سؤيله مندن قوچ تبريزه ، ائشيديرم قولونداكي زنجير سسين. آراز نئجه درين اولسا اوزه – اوزه ، گلهجهيم هئچده دوشمن سئوينمهسين....
سن اؤلنده تاّسوفلر كؤلگه سالدي ، قالدي ائلين باخيشلاري يوللاريندا. سون نفسده يانا-يانا گؤزون قالدي، بو تايلارين خزان وورموش باهاريندا.
باغبان اولدون گيردين باغا گوله-گوله، بير گول اكدين غنچه لندي گول آچمادي. سازگؤتوروب نغمه دئدين بيزيم ائله، افسوس اولا ساری سيملر ديل آچمادی.
سن آنادان اولان گوندن، انقلابچي ياراندين سن. عصيان ائتدين قارانليغا، دوشمن اولدون فرعونلوغا. هرطرفده ستم گؤردون، ظولم اليندن ماتم گؤردون. گئتدين خلقين كؤمهيينه، چاره ائتدين ديلهيينه. قلم چالدين سولا- ساغا، شاهلار دوشدو ال-آياغا. سونگو اولدون دار گؤزلره، سالام دئدين گوندوزلره. ائللر گلدي سوراغينا، گؤز تيكديلر بايراغينا. باخيب سنه جان دئديلر، گونش كيمي يان دئديلر. هاراي سالدين جار ائيله دين، آزادليغي وار ائيله دين. قيندان چكيب قيلينجيني. نشان آلدين شاه تاجيني. انگليسلر هوروشدولر، آمريکایلا گوروشدولر. بويلانديلار بيزيم يوردا ، وار دئديلر خطر بوردا . سن آتيني چاپا-چاپا ، هئچ باخمادين بو هاپ-گوپا، آذر آيي گليب چاتدي ، فدائيلر آت اويناتدي ، وطن اولدو غمدن اوزاق ، داستانيمين آردينا باخ .....
آذر آيي! نه گؤزلدير آدين سنين، من وئرهرم سني عؤمروم آنلارينا. گليشينله چيچكلندي بو وطنين، شهرت اولدون بيزيم اودلار ديارينا.
آذر آيي! سن اوخ اولدون ياد گؤزونه، شفقلرين گئديب چيخدي واشنگتونا. دومان چؤكدو آج لوردلارين گوندوزونه، چاققال كيمي اولاشديلار يانا-يانا.
رهبر يميز قلم چكدي اون بير آيا، دئدي آذر كؤرپو اولسون آل سحره. ايگيرمي بيرآذر گونون سايا-سايا، قيزيل خطله يازدي سني تقويملره.
چاخدي شيمشك،بولوتلاردان ياغدي ياغيش، جوشد و سئللر شاققيلدادي گئن دره لر. باش قوزادي گوي چمنلر قاريش-قاريش، آچدي قوينون بيزه باغلي پنجرهلر.
«سهند باخدي آغ بير چكلي «ساوالانا» گوردو گولور،حنا ياخيب اللرينه. آل گونش ده كناريندا يانا-يانا، سيغال وئرير اونون قارا تئللرينه.
نظر سالدي دادلي، دوزلو گؤي خزره «اورمي گؤلون» گؤردو گليب موشتولوغا آسماندا ايزن وئريب شوخ قمره سلام دئسين بو بايراما، بو دوستلوغا.
شادليغيندان خان آرازدا با خيب يوردا، گؤز ياشيني نثار ائتدي بو تايلارا، انصاف دئييل سولوم آزاد ، ساغيم داردا، آلقيش اولسون محبته، دوز ايلقارا.
حيات گولدو ، چيچكلندي آذربايجان، فيرقه آچدي دوگونلنميش بوحيكمتي. رهبريميز پيشه وري اولدو باغبان، بودور بيزه فيرقهميزين عظمتي.
سونا يئتدي باشيميزدان قاخينتيلار، پاسلي قيفيل پارچالاندي دوداقلاردان. نغمه دئدي ساز الينده "حسين جوان "، توستو چيخدي سؤنوك قالميش اوجاقلاردان،
وجده گلدي شاعرلرين باتان سسي، شعرلري آينا اولدو فيرقه ميزه . ايلمه چالان گؤزللرين ترانه سي ، فرح وئردي قاطارلانميش جرگه ميزه.
جار چكيلدي شهرلره، اوبالارا، سس وئريلدي ائلين سئون وكيللره. ملي مجليس شفق ساچدي بو ديارا، آرخالاندي آذر آدلي نسيللره.
قدم قويدو ايگيد اولان بو مجليسه، وطن دئيه آند ايچديلر بو تورپاغا: كوراوغلو تك ، اجلافلاري كسه-كسه، لقمان كيمي گيرهجهييك هر اوتاغا،
نطقه گلدي بو مجليسده پيشهوري، ائل درديله آلوولانان فرزانه ميز. منده گوردوم دانيشاندا او رهبري، دئديم : تازه بابك دوغوب زمانه ميز.
دئدي :دوستلار! قولاق وئرين سوزوم چوخدور، يوردوموزون كؤز باغلاييب يارالاري. بوندان آرتيق خلقيميزده دؤزوم يوخدور، آدام سايسين فرعونلاري، دارا لاري.
نسيل-نسيل سورونموشوك بو اؤلكهده، حق سؤزوموز خوش گلمه ييب حاكيملره. جلاد كيمي آدديملايان هر كؤلگه ده، راست گلميشيك فرمانلارا، تحكيملره.
هر كيم يالان اويدورمالار ياخسا بيزه، ايران ايله قيريلمازدير ايلقاريميز. اگر تهران بير قول كيمي باخسا بيزه، بو مجليسين قدرتیدير شعاريميز.
نور ساچيلدي بو مجليسين شعله سيندن، مختاريت عشقي ايله يانانلارا. قوي عار اولسون ! اوجا سسله دئيير وطن، بو تاريخي، بووارليغي دانانلارا.
بؤهتان دئمك بير نهضته آسان دئييل، سسيميزه سس وئريبدير خلقين سسي. قوي ائشيتسين بوتون عالم : شايان دئييل، فيرقه ميزه تجزيه ليك افسانه سي.
ائل ياپيشدي بو مجليسين اتهييندن، گولدو سولان قلبيندهكي مورادلاري. اوفوقلردن اسن باهار كولهييندن، الهام آلدي كؤنوللرين قانادلاري.
بو باهارين كئشيكجيسي، ملي قوشون، اله آلدي ستارخانين توفنگيني. سنگر ائتدي آنا يوردون داغين- داشين، عدالت ده تاپدي بوردا اؤز رنگيني.
عوض اولدو تمليندن قديم نظام ، چيرمالاندي يئني دونيا يارادانلار. آنا وطن اؤز قوينونو آچيب تمام، دئدي گلين اورهييمده چوخ يارام وار.
ستارخاندا باش قوزايب مزاريندان، گيلئيلندي بو ائللرين شان، شرفي. دئدي:منيم آديم ايله بير خيابان ياراشارمي توزلو قالا هر طرفي؟
تبريز آچدي گؤزلريني بيرگون سحر، گؤردو گولور آيناكيمي خيابانلار. دان يئري تك پاريلدايير گئن كوچه لر، گؤيدن باخير يئر اوزونه آسمانلار.
قارا آسفالت تؤكولدوكجه هر ميدانا، قوجا تبريز جوانلاشدي بيرآنليقدا. خبر چاتدي قلبي سؤنوك او تهرانا، كور وجداني يانيب ،باتدي قارانليقدا.
نازلانديقجا گلين كيمي دوغما شهر، داراخ ديدي مين طرفدن ساچلارينا. چيخدي ياسدان خومارلاندي گولن گؤزلر، باخدي اركه، قوينونداكي اؤز يارينا.
لوطولاردان نه ايز قالدي ،نهده اثر، گؤزدن ايتدي الي قمه ،چوماقليلار. تنگه لرده باج آلانلار ، باج وئرنلر، کور رحيم تک حرامیلر يوخ اولدولار.
قارني ييرتيخ كاظم گئتدي دارباشبنا، عبرت اولدو الي ايري گزنلره. آچيق آيدين،خلقي سويان اؤز خوشونا، سونا بيتدي،اورهك سيخان بو منظره.
يئرين وئردي قارانليقلار آغ گوندوزه، امن- اماندان نفس چكدي بوتون يوللار. بير مثل ده بابالاردان قاليب بيزه:، باشا قيز يل آليب دولان ديار-ديار.
دئموكراتيسم قاناد وئردي قانونلارا، دوزگون يولا دوشدو بوتون اداره لر. حق وئريلدي حق دانيشان انسانلارا، پارچلاندي سرنيزه لر، قداره لر.
|
|
صفحه نخست پست الکترونیک آرشیو |
| درباره وبلاگ |
حیاتین بیر آمان سیز قانونی وار .... تعصوب سیز میللت گرک خوار اولسون....بولود قاراچورلو (سهند)
.................................. نیه گرگ اوز دیلینی اتا تورک اوز دیلینه اوزگه دیلی قاتا تورک نه گهدر اتسادا اغریم ازاریم گهنهده اد اچیب قالجییام من بابک اولادییام نبی نسلی یم یاغینی تختینن یالاجییام من اغی اذر بایجان بالاسییام من یاغیلار من اوچون ورسه لر زحمت ساتغیننار یاغیلار ویر سالار منت گره دیر گور سه دم شانلی لیاقت بابکین سینمییان قالاسییام من اغی اذر بایجان بالاسییام من تورک اودو کی انا دیلین اتماسین یاد دیله رین گولگه سینده یاتماسین اذر بایجان اولکه سینی ساتماسین انضاف ده ییل بابک یوردو ساتیلسین تورک دیلینه باشقا دیللر قاتیلسین اذر بایجان ستار خانلار وریبدیر کور اوغلوتک قهرمانلار وریبدیر حق اوستونده چوغلو قانلار وریبدیر انصاف دییل اودلار یوردو ساتیلسین تورک دیلینه باشقا دیللر ساتیلسین .................................. ......................... کؤنولوم قوشو قاناد چالماز سنسیز بیرآن، آذربایجان، خوش گونلرین گئتمیر مودام خیالیمدان، آذربایجان. سندن اوزاق دوشسم ده من عشقین ایله یاشاییرام، یارالانمیش قلبیم کيمى، قلبی ویران آذربایجان. بوتون دونیا بیلیر سنین قودرتینله، دؤولتینله آباد اولوب، آزاد اولوب مولکی ایران، آذربایجان. بیسوتونی اینقیلابدا، شیرین- وطن اوچون فرهاد کولونگ وورموش اؤز باشینا، زامان- زامان، آذربایجان. وطن عشقی مکتبینده جان وئرمگی اؤیرنمیشیک، اوستادیمیز دئییب هئچدیر وطنسیز جان، آذربایجان. قورتارماق چون ظالیملرین الیندن رئی شومشادینی، اؤز شومشادین باشدان- باشا اولوب آل قان، آذربایجان. یارب، ندیر بیر بو قدر اورکلری قان ائتمگین، قولوباغلی قالاجاقدیر نه واختاجان آذربایجان؟ ایگیدلرین ایران اوچون شهید اولوب، عوضینه درد آلمیسان، غم آلمیسان سن ایراندان، آذربایجان. اؤولادلارین نه واختا دک ترکی- وطن اولاجاقدیر؟ ال- اله وئر، عوصیان ائله، اویان، اویان، آذربایجان. بسدی فراق اودلاریندان کول الندی باشیمیزا، دور آیاغا، یا آزاد اول، یا تامام یان، آذربایجان. شهریارین اورگیده سنینکی تک یارالیدیر، آزادلیقدیر منه ملحم، سنه درمان، آذربایجان. |
|
RSS
|